اعمال شاقة مع النفاذ

صباح الخير

صباح رجلي الواجعاني من يوم امس الغريب

ما شاالله في البيت العايشه فيه معرفتك بحاجة قد تؤدي الي قتلك

لي سنتين تقريبا من بديت اسوق العربية اي فعلا ده كان انجاز ارتحت من المواصلات ومن المضايقات والمشاغلات ومن ريحة الناس الفي المواصلات ومن التقة مع الكمساري لمن يوقف لي بي مزاجه بعد محطة بيتنا

بس يلا امس بابا ندمني علي انه بعرف اسوق

اولا صحيت الصباح مستسلمة لي الامر الواقع اني حانضف البيت رغم انه رجلي واجعاني فيها شد عضلي من وقفة اليوم كله في النضافة اليوم القبلها المهم وعدت نفسي بوجبة ظريفة محضره بحب وونسه مع صحبتي بعد انتهي من النضافة

يلا بابا كان عنده سناريو تاني لي يومي

اولا بدا بي مشوار لي سوق امدرمان زقاقات ضيقة انا سايقة عربية ما شيفة اخرها وناس في الشارع الحر مزهجها تتولي عنك القيادة ارشادات من باب انك بت وما بتعرفي تسوقي الله يطولك ياروح.

بعدها مشوار علي حدود الولايه يعني وين شارع مدني الخرطوم نشتري اسبير لعربية اختي الناوين يبيعوها وانا عارفه انها حتجي تزعل علي انهم باعوها وتاني برضو انا مالي احسن احلي لساني جوة خشمي واسكت

تالت مشوار الميناء البري يلا انا كل ما امشي الميناء البري ده ضغطي برتفع يعني زول قادر يقرر انه يسافر من ولايه لي التانيه ما قادر يقرر يركب ياتو بص ناس تقف ليك في وشك وتكورك علي البصات زي كوم الطماطم ويبيعو ليك تزكره انت ما عارف البص شكله كيف ولا من مكتب حتشتريها ليه وهل هي مهنه؟؟ انه تقيف تصرخ تنادي علي تزاكر بصات عندها مكاتب يعني بيك ولا من دونك حتبيع التزاكر وتسفر الشعب السوداني البطل

ان شا الله يعملوا لينا بصات لي المريخ اول وحده حاركب

 بعدها عودة للطريق المنطقة الصناعية الخرطوم اييك مشوار زي الجلدة زحمة وجوطة

واقفة مستنيه بابا في العربية الراجل بتاع دكان اطارات العربات بعاين لي كانه بتفرج في سينما فكرت اغمض عيوني حبة من الحر والتعب خفت انوم يجي يعمل زي الشفع الزمان بقوموا لمن الحاجة في التلفزيون تستفزهم بحاولو يلمسوها خفت قاومت النوم بشدة طبعا الصداع قرر يهجم في اللحظة ديك

لسه اليوم ما انتهي

بابا طبعا قرر ما يشتري الاطار ما لانه مستكتره علي العربية لكن لانهم بقولو ارقام خرافية هو في الحلقة الاخيرة مستعمل مش جديد تخيلو يعني في ظل الازمة الاقتصادية نحن حنصل لحدي وين اطار مستعمل بسعر راتب شهر.

 مليتو من الرحلة ؟؟؟

لسة ما انتهت عودة لسوق امدرمان ووتاني نفس الزقاق ولازم ندخل بالعربيه عشان حيصلحوا ليها المسجل واتفقنا نبدله بمشغل اقراص مدمجة وفية شاشه عرض كانه انت في البلد دي" السودان الحبيب" ممكن تسوق وتعاين لي حاجة مع الزحمة في الشارع واحتمال الحادث في اي لحظة

نفسي ززول يقوم ببحث عن مدلات الحوادث في شوارع الخرطوم ما الفي العربات حوداث السكتات القلبية و الجلطات وارتفاع ضغط الدم حيلقوا الضحايا قدر ضحايا الملاريا.

 المهم اذن المغرب وسط السوق وانا من التعب بديت اشوف اتين اتنين

الراجلالبركب في الجهاز ختا المفتاح ومشي يصلي الصلاة في الجماعة بزيادة 27 درجة واتقانك لي العمل بي كم يعني يخليني انتظر مش مسافة الصالة بل مسافة مشيتهه ورجعته من الجامع علي الهعموم ربنا يقبل مافرقت بعد تلاته ساعات انتظار ولف في الشوارع مافرقت علي نص ساعة تاني علي الاقل انا قاعدة في كرسي داخل دكان

ورجعنا البيت الساعة 8 مساء تعبانه جعانه وزهجانه

ماما علا مفترض نمشي نجيب اختك من بيت زميلتها بتقرا معاها في لغة عربية الامتحانات قربت

خطة علا في اللحظة ديك حاكل سندوش عشان اسرع واصلي العشاء والسرير مباشره

نقنقت صليت العشاء وعاينت لي السندوش انه حينتتظر تاني ربع ساعة امشي اجيب اخر العنقود من بيت زميلتها الحمد لله المسافة قريبه

اخيرا جيت السرير بعد يوم طويل

يلا انا بنق ليه

لانه انا عاطلة عن العمل والخطة الرئيسية كانت انتي ارتاح لاني خليت الشغل رغم انه كان علي الاقل حيوفر لي مصاريفي لانه الشغل كان برضو مجهود عضلي وساعات طويله ودوامة ما منها اي فايدة.

 المهم الفيدو التحت ده عبر عن يومي بشده الطفل ما عايز يمشي الدكان

انا ماعايزة اسوق العربية

هنا ادون افرغ عن بعض الغضب و الثرثرة

تحياتي 

هذا البوست لي النقة و الثرثرة والهري 

رجاء ان كنت/ي من اصحاب القلوب الحساسه لا تواصل/ي القراءة

اولا نفسي يوم اجي اقرا الكلام ده واقول الحمد لله كانت مرحلة وعدت

الله يرحم موتانا وموتي المسلمين اسكنك الله فسيح جناته 

تالت ايام العيد انتقلت الي جوار ربها الحاجة امنه حبوبه* كما نناديها هنا في السودان

* جدتي لابي لغير الناطقين يب السودانية

الخبر نزل علي كالصاعقة هي لم تكن مريضة ايقظتني اختي الصغيرة صباحاً لتخبرني بالخبر

الله يصبر بابا وعماتي واعمامي يارب ويلهمهم الصبر و السلوان

هذا العيد اتي مختلفاً من الاول حتي قبل خبر الوفاء كنت من قبل يوم الوقوف بعرفه قررت ان اخاصم العيد

رغم اني اشتريت لنفسي بعض الاغراض في تمرد علي روح الاكتاب التي صاحبتني

لم اغادر سريري يوم العيد رغم مغريات رائحة الشواء وصوت ضيوف في منزلنا

تعبه واحسست باعياء ولكن السبب الاساسي هو اني كنت مكتأبة لم ارد ان اعكر مزاج احد اخر

اعلم بخبرة سابقة ان الاكتأب معدي من الدرجة الاولي

انا والاحلام المزعجة 

انا لم اعتد ان اتذكر احلامي منذ ان كنت صغيرة

لو كانت الاحلام المزعجة دليل علي عدم الراحه فالبد ان لي روح معذبة 

يعني هو المسكلة انه انا الايام دي بنوم من غير ما اقرر اني اقفل كل الملفات واضع راسي فانا انوم وانا افكر

لا يعني بس موجة من الاحلام الهايفة هذه الايام تحاصرني احا كاني ما نمت 

وجوة لا يمكن انت تلتقي في عالم الواقع والاكثر تفاصيل ممله في الحلم وحوارات وجدال مممتد اصحو مرهقه معكرة المزاج ومصدعة

 قراءات ان استحضاراك لمشاهد تساعدك علي الاسترخاء وجميلة سوف تجذب الاحلام الظريفة جربت ومافي اي فايدة

 علي صعيد العمل 

محتاجة جلسات ادارة الضغوط وادارة الغضب الله يستر علي شراين قلبي من وجع القلب 

 كونو/ن بخير 

شخبطه علها تكون بردا وسلاماً علي قلبي

مضي زمن ما كتبت علي مدونتي امر عليها احياناً كثيره
اراها تشكو هجري الا اني لا املك الزمن لاجلس واكتب
اكثر اوقات كتابتي هذه الايام تنتهي بنوبة بكاء هستيرية امسح بعدها كل ما خططت
كل ما اكتب غير مؤهل للنشر فهو مؤلم قبيح
لي اصدقاء وصديقات هنا ماعدت ازوهم/ن  والبعض اغلق ابواب مدونته دوني رغم اني كنت افضل ان احصل علي انزار اولا
شاهدت ذلك الفلم للطيفه حين تتخلي عن كل ممتلكانها وتقرر ان تعيش بقيمتهم اخر ايامها كاميره لانها سوف تموت من مرض عضال
اردت ان اقفز معها بالحبل من علي ذلك الجسر
انا محاربه التلفاز من زمن احساس غبي تكون ما قادر تتابع المشهد من خلف دموعك ....
انصحكم بكوب نسكافية وكيس كبير من الشبس الحار جداً


 اترككم/ن مع غنيه اليوم قد تعزف في زفاف احدهم قريباً  When you kiss me  

http://www.youtube.com/watch?v=S88Wit5bNdY&feature=BFa&list=AVGxdCwVVULXc7rVYvcr1Td_PJESCgUU8T&lf=list_related