بمناسبة عطلة السنه الهجرية

تحذير الكلام لا علاقة له بالهجره النبوية الشريفة ولا بالعطلة  الا العنوان،

بسم الله الرحمن الرحيم وبالنسبة للعطله اهو راحت في خبر كان يعني قاعده في المكتب من الصباح اقوم باعمال مكتبيه بتحتاج مني ربع دماغ ما عشان انا و الحمد لله ذكية لكن والحمد لله انا قاعده في تلاجة كبيره كل المطلوب منك هنا انك تبقا مكنه عادي

زيك وزي الكرسي الانت قاعد عليه وزول تاني عنده جهاز التحكم يحولك يمين شمال.

من الصباح انا قرفانه امس كانت كميه من الاحلام المزعجة الي بتصحا الصباح ولسه اثرها معاك.

كنت بحلم انه في شعر طالع من حلقي وكل ما انا بطلع جزي منه الباقي بنمو بكتشف انه بطلع لسه من حته اعمق شعور غبي انه انت في حاجه طالعه من جواك

المهم الموضوع غالبا ليه علاقه بمكان الشغل الجديد واحساسي بانه انا الشخص الغريب

انا اصلا امكن لم اعاني من الشعور ده من قبل كده فكره انك تكون قاعد مع ناس وعارف انه انت مستحملهم مع انك ما مرتاح ليهمو انه هم حقيقه اصلا بكرهوك بس مضطرين يتعاملو معاك

انا بالعكس فعلا كنت في حتات بعرف انه انا مفترض اقعد واشتغل واجتهد عشان اكسب ثقة الناس فيني بس يعني بكون عارفه انها فترة وبتعدي.

بس الموضوع هنا مختلف انا عرافه اصلا لو كسرت رقبتي انا ما حانفع مع الناس ديل لانه انا با لنسبة ليهم غير مطابقة للمواصفات انا لا انتمي للفئة الفائزة.انا لا اعرف من اين تؤكل الكتف

المهم في هذه الاثناء انا ومديري للاسف الهو برضو جديد بس هو المدير يعني هو علي العين والراس بس انا صديقة المدير من علاقة عمل سابقة غير مقبوله في هذه الاثناء انا وهو بنقضي ساعات من النقاش حول اساليب الادارة هو في بعض الاحيان عنده اساليب ملتويه للوصول لغايته.

انا الايام دي اتمنيت لو عندي برنامج فوتوشوب كنت اتعلمت عليه بدل ما انا قاعده فاضية بس اهو بتفرج علي مواقع جميله علي الانترنت

الاجمل اني بطلت فيس بوك وهذا تدوينه جديده المره الجايه عن لماذا قفلت حسابي علي الفيس بوك الاكثر وراجاُ بين الشباب هذه الايام.